من وحي مسرحية (شارع اللبنانيين) التي ألفها وأخرجها الشاعر شربل بعيني ومثّلها طلاب معهد سيّدة لبنان هاريس بارك، سيدني، أستراليا.
ـ1ـ
مِنْ يَوم ما شربل ظهرْ
شو ما كتب أو قال عم يترك أثر
دْواوين شِعرو نَوّرت كل البشرْ
والعتم.. كل العتم.. بالغربه اندثرْ
ع المدرسِه بيطل
بتفرح قلوب الكل
وبيعلّم الأطفال.. كيف يِحْكُوا عِبَرْ
كيف يصدَحوا..
كيف يفرحوا..
وكيف يدبكوا ويجن بالدبكه الوترْ..
ـ2ـ
.. بالمختصَرْ
علم الصِّغَر
نقشة حجرْ
وشربل بعيني الشعر عنقودو عَصَرْ
من بعد ما تمَرَّى على صفحاتنا أصدق خبرْ..
ـ3ـ
.. بالمختصرْ
مُشْ كل مين هجّى حرف.. جهلو اندحرْ!!
أو حطّ إبنو بمدرسه.. فكرو انتصر!!
ومش كل شجره بتنزرع.. خرج الثمر!!
لازم على أطفالنا يطول السهر..
حتى الميّ تفوت ع قلب الحجرْ
وعسلات دبّور المهاجر تنقَطَرْ..
ـ4ـ
.. بالمختصَرْ
شربل المشهور ببعد النظرْ
مفروض نسمع كلمتو..
العم ينزفا بغربتو
وكلاّ صوَرْ..
تا نبعّد الأطفال عن عين الخطرْ
ويعطوا مواسم خير بِسنين الكبَرْ.
**
