تابع قصائد مفيد نبزو

شاعر سوري كبير من مؤلفات: شربل بعيني شاعر امتي
صدى المحبة
رد على قصيدة الأخ الشاعر المهجري الحبيب عصام ملكي رئيس عصبة الزجل اللبناني في أوستراليا والتي فاضت بها قريحته الشعرية بعد صدور كتابي :  شريل بعيني شاعر أمتي:

بعرف عصام الزجل خيَّالو   
وفارس طموحو فوق آمالو
فارس بإيدو شعلة الفرسان    
ع صهوتو ما في حدا يطالو
صحَّى بصوتو غفوة الوجدان  
وزلزل رموز الشر زلزالو
ورتل تراتيل السما بإيمان 
بلكي بيزهِّر حلم أجيالو
وبعدو ابن ملكي صدى لبنان    
صوت القداسة بطهر إجلالو
غنى بأشعار الزجل ألحان
وسكرت طيور السما بموَّالو
ويا ما غمس من ريشة الألوان   
يرسم وطن بخيوط مغزالو
حارس الأرزة وعبقر الوديان   
ياما القمر زارو بعرزالو
وكل همُّو راحة الإنسان 
ينعمْ ولا يعكِّر حدا بالو
بعرف عصام الشاعر الإنسان   
يِّلي فعالو بتسبق قوالو
الشاعر ابن ملكي إلو عنوان    
صَّياد ربَّات الوحي خيالو
ياما بخيالو رافق الميزان       
ويا ما دفق بالعطر شلالو
وبالليل في لو بالسما جيران    
نجمات شعوا بهالدني وقالو
شاعر الغربة وعاشق الأوطان   
من غربتو شو حنّ ع جبالو
ع الأرز ع الموجات ع الشطآن 
ع الذكريات ال صورتا قبالو
لو كان ملكي الأمر عندي كان   
لزرع بحضن الأرز تمثالو .
**
أرزة
شربل يا أرزه من أرز لبنان
انزرعت بغربة قاسية بعيده
شاعر كبير وللشرق عنوان
ومع كل غصة ألف تنهيده
لا فيسبوك ولا تويتر كان
بيرد أفضالك عليِّ دوم
لو بشكرك يا شاعر الإنسان
بمليون بوست وألف تغريده
**
ترنيمة حب
أحلى طلة يا عيني
فيها الحب بترنيمه
وما في متلا تقسيمه
بتسعدني وبتهنيني
بتسكرني وبتصحيني
رنمها وصلى للرب
وسمّأها ترنيمة حب
بنشوة شربل بعيني
**
فارس الالهام
يا مجدليا العاشق الملهوف داب
من لغز عينيك وبدا بمراهقة
وبعدك عروس الأرز في أول كتاب
شربل الهام بعشق أحلى عاشقة
داق المرارة والهجر داق العذاب
واكتوى بنيران غربة حارقة
شربل الشاعر من جنون الاغتراب
يغزل قصايد بالمحبة عابقة
وبعدو أمير الشعر في عز الشباب
عم تغزل حروفو المعاني الصادقة
شربل يا شربل يا ورد والورد طاب
بعدك علامة والعلامة فارقة
لولا ينابيع الحلا وعذب الشراب
ما تفجرت كل النبوع الدافقة
يا ما غزلت الشعر من نار العتاب
ويا ما كنت متل الرعد والصاعقة
حلقت متل الشمس فلفشت الضباب
وتركت للتاريخ كلمة واثقة
حاربت فيها الجهل وشْريعة الغاب
تا تنجلي عنا الحروب الخانقة
وغرست من غرساتك وهلّْ السحاب
تالخير زهَّر بالغصون السامقة
شربل حبيب القلب من وهج الغياب
صغت القصيدة والقصيدة خارقة
ياشاعر الإلهام ما عندي جواب
إلا بأنك صقر شامخ كالعقاب
جار الشمس فوق الجبال الشاهقة
**
كاس الاشعار
شربل سركيس بعيني
يا مجد مكلل بالغار
مش بس بقلبي بعيني
أنت مْحردة وأهل الدار
ومجدليا بتعنيني
كيف ما بدي منها غار
ال فيها مرفوع جبيني
بأرزتها وشاعرها البار
من شربلها بيرويني
مش كاس معتق بالخمر
الكاس معتق بالأشعار
**
شربل مجدليا
متل ما جبران ببشري
بشربل مجدليا بتتمري
أنتي الصبية العاشقة الأرزات
ومسمحلك تغري وتنغري
يا مجدليا العاشقة الكلمات
شربل بعيني الصخر بيطرِّي ..
مرِّي على خيالو مع النسمات
بيلبسك عقد السما الدري،
وبيسرق الخاتم من النجمات
تا تفرحي بالخاتم السري ..
شربل قصيدة جرح بالآهات
وهيهات عنك يوم يتبري.
**