شربلان/ لطيف مخائيل

شاعر لبناني معروف يعيش في سيدني
شربلان
في تنين شربل ع الدني زادوا حلا
وما بين الله والبشر كانوا صِلا
شربل بعيني للبلاغة والأدب
وقديس شربل للعجايب والصلا
**
 درة
يا بعيني بشعرك معروف
فروخ الجان معقلها
الحروف بشعرك منشوف
متل الدره بتصقلها
**
المتنبي
من بعد مدحك شعر متنبّي الشهير
مفروض من شعرك يا شربل نستنير
مُش بس يا شربل ب"عيني " بقشعك
في لك بقلبي مكان يا شربل كبير
الفايس بوك 2016
**
جبيل
جبيل العيون بينظروا عليها
شربل بعيني نور عينيها
عن شطها حرف الفينيقي طار
وصّل على سيدني ورجع ليها
**
موجود
يا شربل بـ شعرك جود
ورش علينا ورد وفل
مش بس بعيني موجود
موجود بعينين الكل
**
اسم القديس
لو جينا الشعّار نقيس
بتطلع أول بالتأسيس
بحبك يا شربل من حيث
إسمك ع إسم القديس
**
تعليق
شكرًا للدكتور بسام البعيني على كلمته الراءعة واطراءه الجميل لشاعرنا واديبنا المهجري الكبير شربل بعيني ولكن أديبنا وشاعرنا المذكور ليس من مزرعة الشوف وحسب بل من كل لبنان ومن كل الدول العربية قاطبةً وانا للتو ما زلت اقرأ له قصيدة رائعة عن بغداد وثانية عن مصر وو.....
وللتاريخ أقول بان الشاعر العراقي الكبير يحيى السماوي قد قال لي وبوضوح ان الشاعر والأديب " شربل بعيني " هو عميد شعراء العرب في اوستراليا دون منازع .
**
نور العين
يا شربل يا نور العَينْ
متلك غالي بلاقي وَينْ
ومن وقت تعرّفتْ علَيكْ
كل عام بعدّو عامَينْ
**
مارد
مارد قوافي وعبقري معدود
مَالي عيون الكاينه وعَيني
رح زيدْ عَ بعلبكْ انا عامود
ووقّفْ يا عَالمْ شربل بْعَيني
**
تعزية
بعزّيك، يا شربل" أنا وبمد إيد
إيد المحبّه وإمسح بدمعك أكيد
اعذرني بخيّك ما قدرت إحكي قصيد
كلامك جرحني وصاب مني بالوريد
لولا أمير الشعر ع سيدني يجي
ما فيه حرف جديد ع شعرك يزيد
**
أول حرف أطلق
شربل بعيني بالقلب والبال
بمَهجرو اول حرف اطلق
عن بَيْدرو الشعّار عبّو سلال
واعلى جبال الموهبه تسلّق
خمسين عام وعم بيعطي غْلالْ
التاريخ منها الموهبه تنشّق
وكيف ما بنقّدرو ما زال
طابع كُتب من قبل ما نخلَقْ
**
داليدا وشربل
داليدا ست الحلوين
مين الما بيعرفها مين
ام شربل معنا وشربل
صرنا ببيت القديسين
**
برج عالي
يا شربل بعَيني مَلكتْ العَينْ
وشعرك قلوب معارفَكْ مَالي
عَ حْملنا حَمَلتنا حْملَينْْ
ذوق ووفا من قلبك الغالي
ولمّا بهيه كرّمتنا تنَينْ
ومشعالك مضوّا ومشعالي
قدّمِتْ من ذوقها برجَينْ
تا نضّلنا نلمع بجو الشعر
وهيي بتبقى برجنا العالي
**
تعليقات على الفايس بوك
ـ1ـ
شَربلنا مُشْ عاداتو
يحندقنا برّماناتو
مخبّاهن بلكي النسوان
صدفه ع بيتو فاتو
ـ2ـ
يا نسر المعتاد تْطيرْ
وتحلِّق هونيك وهون
لَوْ من قلبك كَلتْ بصير
شاعر حجمي بحجم الكونْ
ـ3ـ
يا شربل همّي لا تزيد
وتحكي بحُبْ وامورّه
زرتك حَدْ وسبتْ وعيدْ
وما تلاقيت بتنوره
ـ4ـ
باتي يا ست الستّات
شربل عن جَدْ بحبّو
انخبّى بعبّو الرمانات
اوّل ما ايدي بالذات
رَحْ تنمَد على عبّو
ـ5ـ
كَافي بحُبك تتنبّا
يا بن بعَيني يا مربّى
شو نفع الكنز البيضل
محجوب وعنّا مخبّا
ـ6ـ
يا شربل لازم نحمّي المكاوي
ونقلب لين منبرنا قساوي
الطراوي ماكدّي مش رح تفيدَك
للحلوين دشِّر هالطراوي
رسول المعرفه ساعي بريدك
وزايد عَ ابن سينا ذكاوي
بسال ربّنا نعمه يزيدك
وع رمّاناتك يزيد الحلاوي
وحلوي تطّل ع ديارك تعيدك
لرغد العُمر وتعيش بنقاوي
القصيد المنبري بيجري بوريدك
وشعرك فلسفه وابداع حاوي
انا بشهَد على روعة قصيدك
وبهيّه شاهده والكل شهدوا
ونْلتْ تقدير من يحيى السماوي
**
قرن كامل
يا شربل بعيني مجد عامل
وخمسين عام وبيرقك حامل
وزرعتْ بالغربه دواوينَكْ
زرعْ البطوله بجبل عامل
من بعد خبره بعرفَكْ مينَكْ
الحَقْ دينك والبُطل هامل
عندي امل تتدوبَل سْنينَكْ
والخمسين تصبح قرن كامل
**
الى شربل بعيني
يعطيك الله العافيه
يا شمس شعر وقافيه
وشمس الحنونه الدافيه
بتقشع جمال السوسني
**
شربل وينو
يا بعَيني بعُمر الستّينْ
عيونك ع الحلوي بتدّل
وقصة حبك اِلها سنين
وغارق بالزنبق والفل
لو سالوني المجتمعين
شربل وَيْنو بأيْ محَلْ
ساكنْ بعيون الحلوين
ومحلّو بقلوب الكُلْ
**
يوبيل الدهب
يا مجدليّا اتذّكري من سنين
شربل هجر ارضِك اِلو مدّه
وبعدو وفي لدروبِك الحلوين
وللورد عند الصُبح بيندّي
وبيحّن قلبو للعنب للتين
ولكركة الضيعه وللمهدّي
للمدرسه للسطح للشربين
لوهج القصيده ولمعة الردّه
لختيار عمرو لامس التسعين
وعَل العصا تاكي وعم يهدّي
للوراق الصُفر بتشارين
للصاج يلمع رغم ما مصدّي
للحلوة اللّي بصَوتها تلاحين
ياما حْلم فيها عَ المخدّه
و" مراهقه " الكاتبلها دواوين
وسطّر شعر ع الف مسودّه
وديوانك الخمسين في محبّين
منهم انا بضمرلَك مودّه
بطلب لالله يدوبل الخمسين
وغير هيك لا بطلب ولا بدّي


يا شربل بعيني انتْ رسّام
رسّام بالاشعار فوق رخام
بتحفر حروف القافيه بالسيخ
تا تخلّد الكلمه مدى الاعوام
شعرك يا نجم استوطن المرّيخ
وبسّام اكتر ما القمر بسّام
شو قيمة الاشعار والتاريخ
لولا ما شربل زيّنو بوسام
شو صار؟ ما بتغفى ولا بتشيخ
قلّي اذا نام السمك بالبحر
معقول عيني يا لطيف تنام


شعرك يا شربل باقة رياحين
مقطوف من وديان اوطاني
ومن روحك الاشعار مسحوبين
ومن دم قلبك حبر القناني
جيت على سدني باوّل السبعين
وجلت الدني وضلّيت لبناني
معصور خمرك من عنب تشرين
وبيادرك بالخير ملياني
وهالحلوة الحبّيتها من سنين
وكتبت فيها شعر وجداني
جهّلتها بتمانيه وستين
وبعدها لليوم جهلانه

وانا شاعر زجل ما خلقت فَوقي
ما برضى غير ربّي يكون فوقي
اذا غيري على القمه تسلّق
انا بعنق الزمن حطّيت طَوقي
الطبيعه وحسنها قلبي بيعشق
من حساسينها كوّنت جوقي
تغنّي شعر للجمهور يلبق
ولشربل شعر عم يكتب ع ذوقي
ومتل شوقي لا خْلق ولا بيخلق
تاسمع كلمتو ع يزيد شوقي
سبع قصدان ع الكعبه تعلّق
وقصيده تامنه من عمق قلبي
جايي قولها بشُكْرك يا شوقي
**
شاعر معروف
بعَيني يا شاعر معروف
ونحنا خلفَك ردّادي
بيادر شعرك عبّو رفوف
مكاتب سدني وبلادي
**
الجائزة
قصيدة الشاعر لطيف مخايل بمناسبة تسلّمه جائزة شربل بعيني، التي أسسها في معهد الأبجدية ـ جبيل، عام 1992 الدكتور الخالد عصام حداد إبن بلدة عين كفاع: 
ـ1ـ
يرحم عصام حدّاد ع الابداع
كان مارد شعر عَ علمي
بجبيل أسّس مركز الاشعاعْ
حرّر شعوب ونوّر الظلمه
وشربل ع ذات الوزن والايقاع
كفّى الرساله بمنهجو العلمي
بيتو محبّين الادب بيساع
وزلمي بعدّو بالف زلمي
بالحرب حربو ع الغرور انزاع
وبالسلم طبعو رايق وسلمي
جمّل الغربه وغيّر الاوضاع
وعاش بحلم عصام وبحلمي
وما بين سدني وبين عين كفاع
تجلّى الوحي واعتزّت الكلمه
ـ2ـ
يا شربل بعيني بنهار وليل
راجع ليالي الشعر تحييها
وتحلّق بفكرك ع نجم سهَيل
والقصيده بفخر تبنيها
لولا يا شربل ما تشّد الحَيلْ
وتسهر على الكلمه ومعانيها
كنّا اندثرنا تحت نعل الخيل
وضاعت قصص للناس نحكيها
لكن بسدني اليوم طفح الكيل
مع ناس معروفي بماضيها
ع الشعر ما بتجيب الّا الويل
وبتريد باقي الناس تلغيها
من ميل شعر مكسّر ومن ميل
بتنظم شروقي بلحن آويها
ونحنا اللّي عنا الشعر دفق السَيل
منقدّس الكلمه ومباديها
وحرف الفنيقي حلّق من جبيل
ووصّل على سدني وبقي فيها
ـ3ـ
وبعد ما الجائزه شربل منحها
وطيور الشعر سمّعنا صدَحها
وبعد ما جوّنا الشعري تلبّد
انجلى والناس رقصت من فرحها
واذا مغرورنا زمجر وعربد
وقال العالم بشعرو كسحها
متل البحر هالارغى وأزبد
وبعد العاصفه نفاوه شلحها
وحَكَم ع كلمة المنبر مأبّد
وحرَقها بجمرة غرورو ودبحها
وشربل منزلو للشعر معبد
وصفات الذات من ذاتو طرحها
وطريق الشعر للشعار عبّد
ما في لزوم غير دروب نمشي
منمشي دروب شربلنا فتحها
**
كلمة بترجع
دمعي كرج ع الخد يا بعَيني
وفجّرت نهر العاطفه بعَيني
وكلمة بنرجع ع الوطن معقول
بقيت ع طول العمر بالدَينه
**
عايش بقلبي
يا شربل بعيني يا خي الروح
قلبك وبيتك للشعب مفتوح
يا رفيق إيامي وحبيب الكل
يا بيرق بوسع المدى بيلوح
كان عطر الفل هجّ وفل
لولا ما ياخد من عطورك روح
عايش بقلبي وبعيوني ضل
وحاجي تقللي من الألم مجروح
دبّر بنت حلوه وفيها غلّ
في وقتها كل الوجع بيروح
**
هاله
يا بعَيني بكل الأوقات
اسمك للكلمة هاله
بالغربة النا حكايات
محفورة العمر ببالي
عم بتعايدني بالذات
يحميك الرب العالي
ما بقدر لاقي كلمات
توفي حقّك يا غالي
**
حيرة
أقع بالحيرة بين تصنيف الشاعر الصديق شربل بعَيني بشاعر الفصحى الّذي لا يجارى، وبين شربل بعَيني الشاعر الزجلي القوي  ففي كل نوع من الشعر يمتاز بالجمالية والابداع والصورة الصادقة، فهو بارع ومُبدع بكل انواع الشعر وبحوره، ومتمكّن من الأوزان والبحور الى حدٍّ بعيد، فهنيئا لنا بغربتنا بشاعر الغربة الطويلة..!
**
غربة شربل
يا شربل انت شاعر قبل جيلي
بنشر الشعر بعتبرك دليلي
نحنا طفال بالأشعار كنّا
وانت قاطع دروب المستحيله
متلك ما التقى انسان عنّا
لدعم الحرف والكلمه الجميله
قلام الفكر كتبت قبل منّا
شربل للمهمات التقيله
وعنّو خبّرت أحمد وحنا
وإذا ما كتبت بتطلع بخيله
وعّى الأرز ع صوت المعنى
وصوبو يا قلوب الناس ميلي
وبموقع غربتو يا ما حضنّا
حضنة شمس لزهور الخميله
بغربة شربل منقشع وطنّا
ووطنّا بغيبتو غربه طويله
**
زجل
شربل:
يا حسرتي ع الشعر قدام الدلال
سوزان شمس مكعنشه بدر الكمال
زاغت عيون الناس من انوارها
تا صار شربل واقف بفي الجمال
لطيف:
يا شربل بعَيني تنعّم بالهنا
بسمتك بتزيح عن قلبي الضنى
واقف جنب سوزان حسّادك كتار
ومن اكبرالحسّاد يا شربل انا
شربل:
يا لطيف القلب فضلك ما نسي
وبيوت شعرك باللطافه مكدسه
ما زال عمري صار ع بواب الفنا
تركني مع الحلوين إفتح مدرسه
لطيف:
يا مأسّس مدرسه عيّن حرَسْ
تراقب صبايا حبّن بقلبي انغرس
افضل مَ انطرهن ع باب المدرسه
ويدّق قلبي كل ما يدّق الجرَس
شربل:
قلبك إذا بيدق يا شب الحلو
بمليون أهلا ومرحبا بستقبلو
لكن إذا بشوفك ع باب المدرسه
من فوق سطح المدرسه بكب الدلو
لطيف:
شفتَكْ عَ سطح المدرسه زلمي كبير
حامل دلو بالايد وبتركض كتير
عرفتَكْ مدير المدرسه ووضعك خطير
خفت ع الطلّاب من سوء المصير
دغري قْفلتْ لبْوابْ من اربع جْنابْ
تا خلّص الطلّاب من شر المدير
شربل:
وصل البوليس وقال مينو هالصبي
الواقف يلطّش ع بنات مهذبه
لولا المدير وكم كلمه مأدبه
كان الصبي ع الحبس رايح كركبه
بس الحنون كتير متلي يا لطيف
بيوقف ع راس السطح نجمه مدهبه
لطيف:
هَيدا الصبي يا شربل مفتّل شَنَبْ
ياما لعنتر عبس دقلّو الطنَبْ
تركلي الصبايا والبوليس على جنَبْ
وعالسطح ضلّك متل ناطور العنب
ما شفتَك على السطح نجمه مدّهبه
نجمه ولكن متل نجمة بو دَنب
شربل:
أكبر شرف تا كون نجمة بو دنب
ضوي العتم.. المع بليلات الأدب
شرفتني بهالاسم ورفعت النسب
مش متل يللي بيشتهي كروم العنب
دنبك قصير وحابب تطال النجوم
خليك فوق الأرض شرقوطة حطب
لطيف:
ع القافيه والوزن مُش لازم تزيح
مفروض توضع بين بطْلْ وحق زيح
بنجمه اذا تشّبهت حكيك مش صحيح
نورك بضو الشمس بيصفّي شحيح
يا ريتني حطبه انا او عود شيح
كنتْ منّك ع القليله بستريح
وبيحرقوني مع وراق اليابسه
ودفّي المغاره اللّي وْلِدْ فيها المسيح
شربل:
إسمك لطيف وليش تا صفّى قبيح
بتقتل بشر قدّام سيّدنا المسيح
تراك الزجل كرمال ألله واستريح
عم تنتقد إنسان شبّعتو مديح
بحبك أنا ولو كنت حطبه وعود شيح
هيك علمني مسيحي بالصحيح
رح إرحمك بالشعر لا تزيد الجفا
عن حب شربل ليش دخلك عم تزيح؟
لطيف:
اسمحلي يا شربل اختم باحلى كلام
رح طَمنك باقي صديقك ع الدوام
لكن اذا شي يوم صوّبت السهام
لا تنتظر منّي محبه وانسجام
لذّة حوار الشعر فجوه واِلتآم
ما يكون ناعم متل ريشات النعام
ولولا صَبَحْ بيناتنا بطش وحروب
بَعدْ الحروب ماّكدي دَورْ السلام
شربل:
ع طول بين اللطف والالفه انسجام
وبين الشعر والشعر شو بيحلى الكلام
شو ما قلت رح ضل حبك ع التمام
وتبقى بعيني الشاعر العالي المقام
واحلى حمامة حب بتجيب السلام
لكن إذا تحديت شربل يا لطيف
لا تزعل ان صوبت لعيونك سهام
**
الجائزة 2019
ـ1ـ
عصام بحكمتو التقدير واضع
باسم شربل لانّو المجد راضع
بموقع " غربتو " وحّد خِصَلنا
وبموهبتو سواد الجهل باضع
ونحنا بفعل تقديرو وصَلنا
وبَيتو للأدب حضن المراضع
عن بعَيني دقيقه ما انفَصَلنا
الشعر لاقى بتكريمو مَوَاضعْ
التقينا وحبل اِلْفتنا وَصَلنا
ولكلمتنا حَرف قدموس خاضع
وبَعدْ ما الجايزه علَيها حَصَلنا
ضروري يمنحو كل شخص منّا
جايزة المحبّه والتواضع
ـ2ـ
وعَ اسم الجايزه كل عام مرّه
سوى جينا بنخوي مستمرّه
وحَكي معسول من بَزّي غَرَفنا
وعبّا الطيّب منّو الف جرّه
ويا عين كفاع ودّي عَ طرَفنا
خيال اللّي زَرَعْ فينا المسرّه
عصام الخالد بذوقو نَصَفنا
ومعهد ابجديّه وناس حرّه
وتحف توفيق زايد عَ تحفنا
وعَ فنّو شْهدت نجوم المجرّه
ومع دكتورنا الساعد كَتَفنا
رامز رزق يا نفس المبرّه
وابن مظلوم كرمالو حَلَفنا
نشيل الظلم عنّو والمضرّه
وبِسايد ابن عيلتنا اعترفنا
الشعر عَ مراية نبوغو تمرَا
بجهد دكتورنا ما عَاد خْفنا
قاسم ثبّت الكلمه المقرّه
ويا سوزان يا زهوة شرفنا
امنحينا من نبوغِكْ بس ذرّه
حتى نحقِّق بجهدك هَدَفنا
وبيجوز نفوز عَ اِسم المعرّه
وعَ شعر مكسّر الدمعه ذَرَفنا
وحداثه عَ وزن نقشه وطرّه
اذا هالنوع للعالم وصَفنا
وجوه الناس صارت مكفهرّه
وبِدارَك يا بعَيني اليوم شفنا
دراري كل درّه حَدْ درّه
واسامي لامعه عالفن ضْفنا

بعد ما شربل علَيها تحرّا
العالم عرفت ونحنا عْرفنا
استحّق الجايزه موجود معنا
والمُشْ خَرجها موجود برّا
**
يا ملكي قول للعَالم وردِّدْ
قصيدة الشاعر لطيف مخايل في حفل توقيع كتاب الشاعر عصام ملكي "رئيس عصبة الزجل اللبناني سابقاً": شربل بعَيني زينة الشعّار.

يا ملكي قول للعَالم وردِّدْ
بانّك للزجل بيتو محدِّدْ
وعلى اللّي جَاب للشعر الاذيّه
ضروري ضربة معلِّم تسدِّدْ
وانا عندي الزجل هَمْ وقضيّه
بأجواؤو نويت الغَيم بدِّدْ
ولهالسباب جايي بهالعشيّه
صفات الشاعر الموهوب عدِّدْ
الشاعر من حلا الكلمه الطليّه
عن عرشو الملك قادر يهدِّدْ
وبميزان الغنا والشاعريّه
بإدّه سكة المنبر يأدِّد
انا خيّك متل ما انتْ خيّي
وبِعطفك قلبك لقلبي مودِّدْ
ربع قرن وصداقتنا سويّي
وعلى الغدر ومنابرنا نندِّدْ
كنتْ ريّس لعصبتنا القويّه
ولِرَفعة منبر الكلمه تشدِّدْ
العصبه اليوم صارت منتهيّه
وانا من بعد منّك مع رفاقي
ناوي عصبة الشعّار جدِّدْ

وضروري الشاعر بساعة سرورو
يحكي الحق ويبيِّن شعورو
وشيطان الشعر يا قلب زركَكْ
ومنحك ربّنا لمعات نورو
وبعد ما بمطهر الأيام فركَكْ
وشعري ع الدني وزّع عطورو
وبعد ما بْعَركة الاشعار عركَكْ
الوحي بقصايدي بيضمن مرورو
ويا ملكي شربل دقيقه ما تركَكْ
الوفا تجلّى بغيابو وبحضورو
يا ملكي لا تظنّو صار ملكَكْ
شربل مْلكْ انصارو وناسو
عَ موقع " غربتو " ثبّت حضورو
**
وين المشكله؟
يا شربل بالشعر عبّيتْ راسي
وبراسَكْ مجمع البحرين راسَي
انتْ صادق بعَهدَك ما بتلوي
ومن المجروح بتشيل المآسي
ما عندك فرق بين جامع وخلوه
جميع العالم بتقشع سواسي
وحلوة كلمتو عن جد حلوه
وحقّق بالأدب رقم القياسي
وبعد ما تخِّف يا رفيقي البلوه
وكورونا تزول وتفّل التعاسي
انا بستاذن الدكتور حلوه
ووَين المشكله نْسلّمت شربل
أمور الشعر وامور القداسه
**
"وْلِكْ"
شو ما يا شربل قلتْ ما بيهِمْ
المهم صافي كتير وجدانك
من شعرك عطور البلاغه بشّم
وبغرف وفا من بحر قصدانَكْ
وكلمة " وْلِكْ " القلتها ما بذّم
قريتها بصفحات ديوانَكْ
من حيث مرقت عَ لسان الام
صارت متل قدّوس عَ لسانك
**
إلى الدكتور مصطفى الحلوة
ـ1ـ
يا مصطفى للفكر اعطِ الامر
وصوِّب عَ طير  المعرفة جفتَكْ
وازرع بقلب التلج وهج الجمرْ
من ربّنا علمك ومعرفتك
واثمار موهبتك يا أغلى تمر
واستاذ علم وفلسفة شفتَك
يا ريت ما مرّوا سنين العمر
وقبل الهجر يا مصطفى عرفتَكْ
ـ2ـ
ومتل عشق الشب للحلوِه
بعشق بلاغة مصطفى الحلوِه
كتابو قلاده مرّصعه بمرجان
رفيق الليالي وتوأم السلوي
ومهما البلاوي تكتر بلبنان
كتابو كفيل يشيل هَل بلوي
بيوحّد الانجيل والقراَن
وجامع ودير وصومعه وخَلوي
يا مصطفى يا اسم للرحمان
مواهبك من ربّنا العلْوي
صار الادب بِعهدتك منصان
وعن طريق الحق ما بتلوي
بتبقى اصيل ودينك الانسان
جْلَيت الحقيقة ونِعمْ هَلجلوي
عشت بْحَنايا القلب والوجدان
بْتسري متل ما الدّم بالكلوي
اسمحلي انا للمعرفة عطشان
أدلي ببحر مواهبك دَلوي
متلك انا للفلسفة عشقان
وهج البلاغة ونهجها ما بظن
حلوي متل ما كلمتك حلوي
ـ3ـ
وتحيا الجايزه والاسسسوها
ومن جبيل الفينيقية عطوها
عطوها عَ اساس وعَ ركايز
مواهب ناس انتوا بتعرفوها
عطوها لْكاتب وفنّان فايز
ولشعّار عَمْ بتكرّموها
وبسدني بالعكس في ناس جايز
متل ربطات خبز يوّزعوها
واذا المعتوه شهره ومجد عايز
الشهره مُش جريده بيشتروها
الشهره مش عْصي باِيد العجايز
اذا ما استعملوها بيشلحوها
وشربل قيمة التقدير حايز
وعلى اسمو الجوايز يمنحوها
على الطرقات ما وزّع جوايز
في " معهد ابجدية" وناس حرّه
عطوها بس للّي استاهلوها
**
شربل وصنين
تباركوا يا شربل سْنينَك
ومن حَولك اجتمعوا محبّينَك
يا سَبع لا تفزع من السبعين
يا ما سْبَعتْ ناس بدواوينَكْ
في ناس هجروا موطني من سنين
وتاهوا ما عْرفوا بالشعر مينك
قلتلّهن في شربل وصنّين
ذات المجد والعز  والهَيبه
شمخة جبينو وشمخة جبينك
**
حادث سيارة
بعيني فكارو محتاره
مرّ بحادث يا خساره
شاعر بارم نص الكون
بتبرم فيه السياره
**
عصبة
يا شربل شدّ ع صهوة حصانك
متل الارز شمخة عنفوانك
أنا تعرّفت عَ شعّار  جمّا
ووحدك أنتْ ساحرني بيانك
أسمك خيّنا الشدياق سمّا
معنا تكون وتعزّز مكانك
يا بتكون بالعصبة يا أمّا
عذارى الشعر رح تقطع لسانك
**
بحر ونقطة
لطيف مخايل:
بكلمه عنّك وبلقطه
عَ الحرف بحّط النقطه
نحنا النقطه وأنتْ البحرْ
ولا بالحَقْ ولا بالسحرْ
بيتساوى بحر بنقطه
شربل بعيني:
النقطه العم تحكي عنها
بشعرك انت مزينها
بحيرة شعرك يا لطيف
نحنا عم نشرب منها
لطيف مخايل:
تسلم تسلملي حروفَكْ
عليّي فايض معروفك
إسمي لطيف وبالفعل
الطف من حالي بشوفك
 شربل بعيني:
لا تتواضع يا لطيف
مدهب شعرك بالغربه
الدهب ما بعمرو خفيف
ميزانو جوّات قلبي
لطيف مخايل:
لمّا كبرنا وريّشنا
بحُب بعَيني جيّشنا
الغربه مرّه وشفت العكس
بغربة شعرو عيّشنا
شربل بعيني:
بوجودك ما في غربه
يا لطيف اللي بقلبي
الغربه بتبدا لمن أنت
بتبعد عني وعن دربي
**