شربل بعيني المعروف/ نديم سابا

شاعر مهجري من كفرحزير الكورة

ـ1ـ

يا شربل المعروف.. شعرك هالجميل

هديّه تمينه لجيلنا.. ولألف جيل

وكل كلمه قلتها وبتقولها

بتنعش قلوب الناس.. وبتشفي العليل

ـ2ـ

كل كلمه قلتها وبتقولها

ملوّنه.. ومركّبه ع أصولها

جمعت القوافي بعرضها وبطولها

وجمعها ع شعورك وفهمك دليل

ـ3ـ

يا شربل المعروف.. قلبي لَيْك مال

حبّيت مدحك.. ضاق قدّامي المجال

بهنّيك.. متلك رَيْت في عنّا رجال

ويا رَيْت عنّا كم نبيل وكم أصيلْ

ـ4ـ

والـ كان متلك.. كيف بدّنا نعاملو

وكيف بدنا نجهلو.. أو نهملو

نبع القوافي والشعور الحاملو

ما بينقص قدّ ما منّو تشيلْ

ـ5ـ

يا رفيق الشعر.. يا إبن الكرام

بالعطاء وبالكرَم نلت المرام

بقلوبنا.. عندك محبّه وإحترام

ومرافقك حتّى على الدرب الطويل

سيدني 1988

الياس بولس بعيني وشربل بعيني في مغارة جعيتا

**

مشوار

ـ1ـ

يا شربل.. شو جميله هالهديّه

من قلب الوفي وروح الوفيّه

حافظها معي تذكار منّك

طابعها على روحي الشاعريه

ـ2ـ

حافظها معي تذكار منّك

مهما غبت بتنوب عنّك

ومهما صار ما بيخيب ظنّك

هديّه جمعتها بكتاب هادي

ومهدى من رجال العبقريّه

ـ3ـ

هديّه جمعتها بكتاب هادي

كامل في يقيني وإعتقادي

عنّك للبشر عطيت شهاده

ولو ما جَدّك.. ولو ما فعالك

ما صارت الطبخه مستويّه

ـ4ـ

لو ما جَدّك.. ولو ما فعالك

بالي ما ارتاح وراق بالك

يا شربل ربّنا يكتّر متالك

كريم الأصل بتحب الخليقه

بتكرمها غبيّه أو ذكيّه

ـ5ـ

كريم الأصل بتحب الخليقه

لأنك حامل عواطف رقيقه

وهمّك للبشر تهدي الحقيقه

وهيدي موهبه بهنّيك فيها

وعطيّه.. وشو جميله هالعطيِّه

ـ6ـ

هيدي موهبه بهنّيك فيها

الـ خلقنا لكل واحد ما هديها

قلوب الناس.. كم شعرك رويها

وعم بيرافقك كم ألف واعي

قلبو صادق ونفسو أبيّه

ـ7ـ

عم بيرافقك كم ألف واعي

بيروح الصدق صاير عم تراعي

يا شربل من إلهي لاك داعي

بالتوفيق.. وانشالله الكرامه

تبقى في ديارك سرمديّه

سيدني 1988

**

خيّال

يا شربل ريّح بالك

ولا ترد عْلى هالأطفال

شايفها الشمس قبالك

والشمس شافوها خيال

عم تشهدلك أفعالك

خيّال وأفضل خيّال

الواوي ما قدر يطالك

الواوي رح يبقى واوي

وشربل رح يبقى رجّال

صدى لبنان، العدد 648، 30/5/1989

**

كونوا متل شربل

ـ1ـ

شربل صريح.. وسامع من السامعين

بينحبّ وبينعدّ خير العاملين

بيشفق ع شعبو كل ساعه من النهار

مجبول قلبو بالعواطف والحنين

ـ2ـ

كونوا متل شربل كبار مشجعين

وخلف التآمر لا تكونوا راكضين

حلّوا المشاكل.. نوّروا هالجاليه

وباركوا الأديان دين بضهر دين

ـ3ـ

وقلبي متل قلبك على الفرقه حزين

ما بتنمحى من فكارنا هاك السنين

وان هديت الحاله ورحمنا ربنا

إنت وأنا لبيروت بكرا راجعين

ـ4ـ

شربل بينعد من أكرم شباب

وأهل الصحافه بتحسب لشربل حساب

الـ بيكرّمو بيكون من أهل الكرم

الـ بيهاجمو.. أفضل يعيش بلا تياب

صدى لبنان، العدد 644، 2/5/1989

**
بعد الجوائز.. قشّر البصلات
ـ1ـ
في ناس بفهما وعلوما فايزه
وما بدها الشهره ولا مدحا عايزه
وفي ناس بتحب المدح والثرثره
منشان من شربل تا تاخد جايزه
ـ2ـ
قالوا الجوائز كلها خرافات
لشربل بعيني وصلوا الكلمات
ذكّرتني بستنا الكانت
تحكي لنا بزمانها حكايات
ـ3ـ
خرافات لأهل العلم بانت
ومسخره بعيّونا بالذات
وأهل المبادي عقولها خانت
لو وافقت عا نشر هالعادات
ـ4ـ
وفي ميزان العقل لو زانت
بتضحك على المنبر وعالوقفات
وكتابنا من جهلها عانت
وفي جوّنا ما عندنا فلتات
قلوب الصداقه بشعرها لانت
وراحت لشربل في صراحه تقول:
بعد الجوائز قشّر البصلات.
**
كتابك
هالتشاك الـ رجّعتو
يا ريت بالبنك وضعتو
ونديم كتاب التاني
يستلم، ما شجّعتو
كتابك وصلني وجاني
متل النجمات قشعتو
عليك الوحي الربّاني
نزل، ما قدرت جمعتو
يا شربل.. يا لبناني
الشعب الواعي قنّعتو
روحك عطف مليانه
والعطف فينا زرعتو
غيرك غاب ونساني
وصوتو ما عدت سمعتو
وهالـ عاداك وعاداني
يالبغض ما طمّعتو
ولا اعتدى عليه لساني
وما بذكر كيف ودّعتو
دعوتنا مش خربانه
وصاحبنا ما راجعتو
ويا شربل غنّي غناني
تغزّل بعيون الحلوين
وفاخر بكتاب طبعتو
سيدني، 1/12/1989
**
هديه
ـ1ـ
يا شربل.. وصل الكتاب
الما كنت حاسبلو حساب
وصل ع البيت هديه
منّك يا أغلى الأحباب
ـ2ـ
وصل ع البيت هديه
حامل نغمه شعريه
شربل البعيني خيّي
وبعدّو شيخ الشباب
ـ3ـ
بتعجبني برجال الدين
مكشوفين ومعروفين
برأيك فيهن شياطين
ما بينفتح إلهن باب
ـ4ـ
ما لقيت بعمرك نضيف
ولا أصيل ولا شريف
من التنصيب.. من التجديف
خبّرني انكان شعرك شاب
ـ5ـ
طوّل بالك مهما صار
وحاجي بهالشعب تحتار
الـ شلحوا عليك جنون النار
يا بوزهريه.. يا كلاب
ـ6ـ
والـ ضربك يوم على الخدّ
خد التاني لصوبو مدّ
وضربات الجاهل لا تعدّ
ولا تفرّح طيشو بعتابْ
ـ7ـ
المهم تريّح بالك
وتبسط من أفعالك
ألله يكتّر أمثالك
ويبارك هالـ متلك جابْ
سيدني، 7/10/1991
**