مقلع بعيني/ روميو عويس

شو هالخزانه؟.. بينك وبيني

فتحتها.. ما صدّقت عيني

الإلماس فيها حجار حد حجار

مقصبه من مقلع "بعيني"

وأشعار متلا ما شفت اشعار

متل السوار بمعصم الزينه

وكل كلمه اختها بتغار

ومتل السحر بتنام بالدينه

النقد متل السيف حدّو نار

والغزل مرجة حب بجنينه

يا خزانة المش لامسك نجّار

أحلى هديّه ع "البسترينه"

درفات حب وأجمل الأسرار

فيها مخبّى شربل بعيني

صدى لبنان، العدد 444، 23/4/1985

**

إلى شربل بعيني

ـ1ـ

كتابك مواسم حب ع البيدر

أحلام فيها ابيض وأحمر

وبنفسجي.. وشي الف لون ولون

وكل حلم اوسع من مجال الكون

بياخدك.. بيبَيْعدَك من هون

وانت هون وبس.. عم تسكر

ـ2ـ

شعرك بيعطي القلب دفع جديد

للحب.. للعمر اللي صار بعيد

ونشوه بلا خمر وبلا فنجان

وعاطفه وحب وصلا وايمان

ودموع وعذاب وجفا وتنهيد

وثوره على الظلام والمنكر

صدى لبنان، العدد 308، 3 آب 1982

**

البيت الذي ولد فيه شربل بعيني في مجدليا ـ زغرتا

بيت شربل بعيني
يا شربل بيتك قلعه
مدرسة طموح
ما بتعطي متلك بدعه
غير هيك صروح
**
الأصل ما بيموت
شربل بعيني الأصل ما بيموت
بينمحي زكرو الما تارك زكر
وانت؛ شعرك قوت، كتبك قوت
للمكتبه، للمدرسه، للفكر
**
ديوان "فافي" لشربل بعيني

إعلامي وشاعر مهجري معروف 
فاز بجائزة شربل بعيني لعام 2016

ـ1ـ

كتابك لْـ "فافي" دمعة الحرمان

اللي بتنسكَب عَ دروب الحفافي

بعيده المسافه والورد دبلان

وقدّيش بدّك دمع بالفنجان

تجمّع.. تا تسقي وردك العطشان

وتختار ورده.. وتهديا لْـ "فافي".

ـ2ـ

شربل بعيني.. يا صبي جهلان

مولّع بلمّ زهور الحفافي

مدري سرقت نشوة طفل غفيان

مدري السحر عَ ريشتك لافي

مدري استعرت الروح من جبران

لمّا رسمت بقصايدك "فافي".

ـ3ـ

الشاعر بيضلّ مقلّق وسهران

يفتّش حنينو عَ حضن دافي

بمصر عرفو، وهون، وبلبنان

شربل بعيني معجب بـ "فافي".

**
عزّك دايم
عزك دايم يا بعيني
وعا طول بتبقى منوّر
العزو بيرحل يا عيني
من اساسو عز مزوّر
ميلاد 2013
**
إلى شربل بعيني
يللّي الكلمه من صغر سنَّكْ
حبّيتها، وصار الشّعر فنّك
وتكبر، وشعرك يمتن ويكبر
غار الفضا.. وغار الجبل منَّكْ
بتبقى الجواهر قد ما تكتَرْ
ع سعرها.. وجوهر لأنَّكْ
بيشعر بحالو الحكي مقصَّرْ
مهما انحكى.. ومهما انكتب عنَّكْ
البيرق، العدد 1855، 8 شباط 2001
**
الى الاستاذ شربل بعيني
من يوم ما عرفتك انا.. من زمان
عرقتك.. اديب، وشاعر، وانسان
يا ما تحت جنحك .. ربي طلاّب
بالمدرسة، واليوم صارو شباب..
عن يرفعو متلك .. اسم لبنان.
الفايس بوك 2013
**
صوت دافي
ـ1ـ
شربل بو الصوت الدافي
بدرك لامع مش خافي
شعرك بيحبوه الكل
دافي وبهية وفافي
ـ2ـ
بهية ست الحلوين
سحر ولطف وذوق ولين
وانت يا كبير الشعار
طول عمرك مرفوع جبين
ـ3ـ
يا استاذي صارو قلال
البيضَحّو بوقتن والمال
لاجل الشعر واهل الشعر
وكتار لسانن رسمال
بيزتو كلام بلا سعر
بيعبو المَيّة بسلال
بهية مرفوعة القدر
الها البرنيطة بتنشال
ـ4ـ
وانت لبلادك نبراس
فيك بيتباهى صنين
ونحنا فيك منرفع راس
شاعر حر وعالي جبين
فايس بوك 3/9/2014
**
يا صديقي
بيك يا شربل يرحم ترابو
ويرحم المتلو من الدني غابو
رجال كان بقلبهن ايمان
ومن بعد الله يعبدو لبنان
يا صديقي :المتل بيّك كان
عالسما بيروح بتيابو .
**
شعرك يا شربل
 شعرك يا شربل نَفح قَنّينه
بينعش الروح، بتنتشي الكاسات
بتْعَمّر قوافيك بالزّينه
وطرحة عرس بتلَبّس الكلمات
خيالك طَويل الباع، عَ الهينه
بيطال وقت لْبدَّك النجمات
بتبني لبيوت الشعر تصوينه
من ورد جوري، تْعَطّر الابيات
قلّي شو نَوْع الخمر، يا هْديني
عَ الكاس، عَ الخمّار، ع المازات
يا من الخوابي لْعنْدَك هديني
شي مْتَلّته، تَ صير اكتب شعر
بيشبه شعر لبْتكتبو بالذات.
الفايس بوك 2016
**
عبلى
شربل البعيني قدّا
شباب العصر تحدّا
نطرني اليوم 11 ونص
حتى نطلع نتغدّى
ـ2ـ
يا شربل شعرك موزون
وبعطر الشهوه مدهون
أمّا الشّعرا هيك تكون
يا امّا بوازا تسدّا
تعليقا على ديوان عبلى 2016
**
 سلطان
من بعد نَشْر "مراهقه" بلبنان
وضَجّ وقتا بثورتو الميدان !..
شربل عِقِل،لا عاد يكتب حُب
ولا يفلفـش دَفْتَر النسـوان !..
قلنا: الحمدلله هَداه الرب
طَلَّق الجهل.. وعاد للإيمان
تاريه عم يشقَع صُوَر بالقلب
وحنّت قلامو لماضي زْمان
ورجع بخريف العمر قلبو هَب
عن يكتب قصايد عشق جهلان
يا بعيني.. الشاعر المنْحَب
بكل ساحات الادَب سلطان
بالغزل بَعْدَك نمر.. والدرب
بَعدا ربيع ومَقْصَد الغزلان
المتلنا ؟ بيضَل قَلبو شَـب
وبيلَهّبو القَدّ الحلو الفتّان؟
لا يعلن التوبه وبلا ما يسب
عا الخطايا ويلعَن الشيطان
المتلنا شعرو هوى رنّـان
ما بِتْرِحْلـو بـَدلة الرهبان.
**
عيد الميلاد
ـ1ـ
لمّا الحكي ع الشعر والكتّاب
شربل بعيني الشاعر الأكرم
ما في حدا يجمع شمس بكتاب
شربل الشمس شروقها بلا غياب
وكل القوافي بطلتو بتغرم
ـ2ـ
شعر شربل للسما حلّق
بماضيه، للمستقبل، وهلّق
الشاعر انْ مات الشّعر ما بيموت
بيضلّ للأجيال زاد وقوت
وبيضل صوب المجد يتسلّق
ـ3ـ
بالشعر.. نفحات الأولوهيّه
مدابح صلا.. وبيوت مبنيّه
لوحات.. بتلاوينها في سحر
ما همّ أيّا وزن.. أيّا بحر
المهم في لمعات مضويّه
ـ4ـ
إبن البعيني للوفا عنوان
إنسان خلقه.. بداخلو إنسان
بمهنتو متل النحل دوّار
الشهد بجرار الصحافي خبار
الْبدّو خبر.. "بغربتو" الخزان
ـ5ـ
تسلم يا شربل.. صاحب المبدا
حملت الرساله وطلعت قدّا
مربّى ع كبر النفس والأخلاق
بلا تفرقه.. رفاقك ع طول رفاق
وع حدود غيرك ما بتتعدّى
ـ6ـ
يا شربل بعيني بـ جوّ العيد
بغمرة فرح.. خلقان طفل جديد
جايي ميلاد الرب.. والمولود
حامل قصيدة شعر.. غمر ورود
حتى بـ عمرك يا صديقي يزيد
**
جرة
 يا شربل رابع مرّه
بقصد ما بلاقي الدرّه
قايلّي ابقى حاكيك
تا ببيتك إبقى لاقيك
برجع.. وبعيد الكرّه
لو ما قلبي معلَّق فيك
كنت بزعل ما براضيك
وبكسر عا الصحبه الجرّه
**
زوادة
 شربل.. ما لك بالعاده
من البيت تغيب زياده
هاي تاني مرّه بزورك
وبرجع من دون افاده
كنت تمنيت حضورك
واسمع شعر وقرادي
ومن قصدانك من نورك
احمل احلا زواده
**
شاغل بالي
الشاعر شربل شو صابو
شاغل بالي بغيابو
ما لو عاده هيك يغيب
والمكتب يغلق بابو
الفايس بوك 2016
**
عنتر
بالعودة الى كتاب للشاعر شربل بعيني بعنوان - عبلى - احببت ان اعلق عليه مرة اخرى بعد مراجعتي لبعض قصائده النارية بالقول:
انكنّو كتاب الشعر عنوانك
طمَّنتني عّنَّك.. عن حصانك
بَعْدَك الحمدالله عال العال
وبعدا الحراره بْدَم شربانك
وبَعْدَك بساحات الهوى رجّال
وبالحب بَعْدَك عَنتر زْمانَك
الفايس بوك 2017
**
مرسال
يا شربل هيك الانسان
جسم بيرجع لترابو
وللروح.. الرب الرحمان
بيفتَح بالحنه بوابو
بعرف خَيَّك قدوه كان
ودشَّرنا بعز شبابو
لكن بقلوب الاخوان
باقي وبقلوب الخلان
وقلب العيله وأحبابو
الفايس بوك 2017
**
جايي لعندك
لا تقلي زوباع وزيت
مع بصله خضرا تغدّيت
جايي لعندك يا شربل
جاوبني انكنّك بالبيت
الفايس بوك 2017
**
ريّس
شربل استاد كوَيِّس
قالوا الكْبار
 ان صنَّفْتو بيطلع ريِّس
بين الشعار
الفايس بوك 2017
**
اسمك وطن
.. وتبقى عناقيد شعري خصلاً من كرومك الزاخرة بالعطاء. أهديك شاعرنا الكبير شربل بعيني ديواني "عناقيد شعر" مع محبتي وتقديري:
إسمك وطن.. شعرك علم مرفوع
نبيد الشعر من نفحة قوافيك
قصايدك بتشد راسا طلوع
بيت الشعر بيشوف حالو فيك
**
دهب صافي
لصديقي الغالي الشاعر الكبير شربل بعيني أهدي ديواني "كاس نبيد" مع هذا البيت من الشعر عربون محبة وتقدير:
لما الشعر نشوة غفا بينام
بيوعا حلم بيقلبك الدّافي
وعا قد ما بقلبك وعت أحلام
وشعر الـ ببالك تنقلو لِقلام
صارت دواوينك دهب صافي
**
سيد المنبر
شربل بعيني سَيِّد المنبر
فصحى وزجل بالشعر مالي العين
كل ما سنة تكبَر، قَدَر تكبَر
تعيش بهنا انشالله العمر عمرين
**
مبروك العيد
يا شربل مبروك العيد
الله صحّه وعمر يزيد
وتبقى شعلة فكر وحب
وخمرة شعرك اغلا نبيد

**
لا تخاف من بكرا
كتب الشاعر روميو عويس هذه الأبيات الرائعة رداً على قصيدة "سبعون عام" للشاعر شربل بعيني:
شربل يا شربل الف العوافي
هللي عطيتو.. للأبد كافي
وبعدو على حالو النبع فوّار
بدفق الجواهر والدهب صافي
لا تخاف لو تلتين عمرك طار
قلبك مراهق هايم ودافي
بعدك عم تشرقط قصايد نار
لابسه فساتين شفافه
والورد منها والحبق بيغار
والنحل ع بساتينها لافي
لا تخاف من بكرا ان صرت ختيار
بتضل شربل ريّس الشعّار
وعكازتك بتصوّر قوافي

**
اليوبيل الذهبي
وبعدك عا حالك من بَعد خمسين
عا طلوع اول فجر بكتابك
وبعدك بتكتب شعر للحلوين
لا بتتعب ولا بيدبل شبابك
شربل لا تفزع من برد تشرين
بعدو الهوى بيدق عا بوابك
**
لون الغربه
يا شاعرنا بترجاك
لشعرك ما عملت زيادي
صَدِّق يا شربل لولاك
كان لون الغربه رمادي
تكريمك واجب عالكل
يا رافع اسم بلادي
**
شربل وجوزاف
ـ1ـ
انت وشربل احلا تنين
فيكن معتزه بلادي
يحميكن الله من العين
ويعطيكن عمر زياده
ـ2ـ
انتو تنين بتمتازو
رفقتكن زادت علمي
خي الشعر واستاذو
شيخ المنبر والكلمه
**
ما بتقول مينك انت؟
تلفنت يا شوقي .. وانا ما صْفَنت
جاوبتك: عْلى الراس سؤالك
يارفيق بحقوق البشر آمنت
ونشر الثقافه والوعي مجالك
ومطرح ما في مظلوم عَنّو حزنت
متل لكأنّو الظلم عا عيالك

مرّه جديده .. هالمسا برهنت
الاخلاص ابنك.. والوفا خالك
عا قد مقدرتي الحكي دوزنت
كرمال لبعيني.. وكرمالك
ياشربل.. بنات الشعر جنَّنت
تلال القصايد.. ملعَب حجالك

وانت؟؟ ما بتقول مينك انت..
ولا بتسجد مقابيل تمثالك
وما بتدّعي انّك الشعر عجَنت
وبتْعَلِّق نياشين لَـ حالك

انت شعرك بالدهب ما وْزَنت
نحنا منعرِف كَمّ رسمالك
انت شاعر وقت ما تكوّنت
موزون شعرك.. والمدى خيالك

وشيخ التواضع والوفا يرهنت
بسيرتك.. وبكل افعالك
لا الوطن خنت.. ولا صداقه خنت
ولا في حدا يْغَبِّر على ديالك

بشعرك فرضت وجودك وبيّنت
وتكَرّمِت من فَوق اعمالك
انت ساحات الادب لوِّنت
بكتبك.. بوقفاتك.. بأقوالك

خمسين سنه .. تاج الشعر زِيَّنت
وبَعدو بذات النور مشعالك
ولما كتاب "مراهقه" عنونت؟
قال القلم.. للادب: نيّالك

ومراهقه عا ايدها تمرَّنت
وبعدو هواها معمشق بشالك
مراهقه لقلمك لوصفا رهنت
شاخت.. وبَعدا مراهقه ببالك

كان الربيع!..سكرت وتشيطنت
وللهوى شرَّعت عرزالك..
وشاب شَعرَك.. قَلب؟ ما تشرنت
كبر العمر ما غَيَّر حوالك..
قلبك حِلي من كِتر ما تحلونت
وريقا الحلو بعدو بيحلالك

بيوبيلها الخمسين.. شاهد كنت
عيد الهنا.. لباكورة طفالك
ليوبيلها.. كل الدهب خزَّنت
تعيش ميّة عام بدْلالك..
من القلب بدعيلك: الف مبروك
ويوبيل ماسي تشْهَدو قبالك
ويضَل يدفق شعر شلاّالك
**
سهار
يا ريّس الشعار
شعرك متل نوّار
يا سَهل من ازهار
كلّو حلو كلّو
شهد ع حلّو
ورد كلو قمار
بس سهار
**
شاعرها الكبير
يا شربل بعيني بعدّك خيّنا
وبالجاليه معروف شاعرها الكبير
طيفك إذا بيمر مرّه بحيّنا
ع طول رح منشم نفحات العبير
**
شربل وعصام
ـ1ـ
البدّو بعين الشمس يتطلّع   
رح ينئزي.. عيون الشّمس من نار
القادر ع عرش الشعر يتربّع   
بيصير إسمو "زينة الشّعار"
ـ2ـ
شربل.. برق قصدانك بيلمع   
ومشيت قبل الكل بالمشوار
ومن طلعتك متل النسر تطلع   
وع درب عمرك تفرش الأشعار
وأيّا الأحلى.. بينُن منحتار
ـ3ـ
وملكي الشاعر صاحب السمعه   
بسبك القوافي ما عليه غبار
بقصايدو بتشرقط اللمعه   
والوزن قلّو: ريّس المضمار
أسهم حروفو كتير مرتفعه   
عنو حكو أهل الشعر الكبار
شعر الحلو من عتبة النبعه 
والنبع منّو بتهدر الأنهار
من طلعتو ع قمّة الطلعه   
وختيار.. ما بينقال للختيار
وشاعر وفي للحقد ما بيسعى 
مش متل غيرو من القوي بيغار
ـ4ـ
كتابك يا ملكي للوفا شمعه
لشربل ندرتا وشعت الأنوار
كتابك ورود الكون مجتمعه
بباقه.. ع شكلا ما جمع نوّار
تسلم يا ملكي .. جامع الأزهار
وعمرك يطول يطول يا ختيار

**
موقع الغربه
كيف بشكرك يا موقع الغربه
الـ فَجْرَك ادَب ونوارك مْحِبِّه
بتشرق علينا وعا مـنـابعـنا
فصولك غَـنيّه وجَيّده التربه
بتْضَل بالاوطان جامعنا
وبقلامنا صفحاتك تْعَبّي
وتا ما بأدب باهت تطالعنا
بتغَربلُن حَبّه ورا حَبّه
وصاحبِك شربل بيشَجّعنا
ياما فرشلي بالورد دَربي
انشالله عا طول تضَل مَرْجَعْنا
قَدرَك كبير وحبَّك بقلبي

**
مشتاق
يسعدلي صباحك يا كبير
شعرك ع جناحو منطير
ألله ينهي الكورونا
مشتقلك يا "بعيني" كتير
**