شاعر لبناني معروف |
شربل بقلبي تمجد رسوخو
حروفو صلا ما تعلموا يبوخو
و بالموهبي و الشعر و الأوزان
نسور المواهب كلها فروخو
و عا مسمعي صوتو لحن رنان
من نغمتو الأوتار بيدوخو
بيوتو بصومعة الوحي رهبان
و تنسكو و مش ممكن ينوخو
و عنك حكو مروان مع مروان
أبيات لبسها المجد جوخو
و يا ريت فيها هالدني إنسان
متل شربل بالعلم و الفكر
كان الشعر ما تزعزع شموخو
**
قصيدتي عربون محبه و وفاء بمناسبه تكريم (والدي الروحي) كبير الشعر و الشعراء الدكتور مروان كساب و نيله جائزه شربل بعيني في ٢٠٢٣/٦/٢٩ (سيدني-أستراليا) و الشكر الكبير للشاعر الكبير شربل بعيني لمنحه هذه الجائزه و للدكتوره بهيه أبو حمد رئيسة منتدى الشعر في بلاد الإغتراب (سيدني-أستراليا) و راعية الشعر و الذي جمعت شتات الشعر و الشعراء و التي توجت هذا الإحتفال بحضورها القيم.
و إليكم هذه القصيده.
مروان بعدو شموخك معرم
و عالدهر باقي إسمك محرم
شعرك قوافي بكر ما بتشيخ
و ياما الوحي عا كلمتك برم
و الموهبي دوختها تدويخ
و شربل بعيني هالوقت ترم
المقصود يجمعكن بهالتاريخ
تا الموهبي تسجل خلود الشعر
و الجايزي بكساب تتكرم
و فكر كساب سبحان اللي عاطي
بحر طامي ما في عندو شواطي
صوتو كلما يصدح بمطلع
الدهر بيصير جندي إحتياطي
خيالو من المدى و الكون أوسع
و بي إسمو الشعر و الإلهام لاطي
محامي و كان للشعار مرجع
الوحي خلفو عا درب المجد خاطي
جمع فكرو من البحرين مجمع
و على منبر زجلنا كان ساطي
و بتكريمو صرت أشعار إسمع
من شعار فيهن إختلاطي
إلن مني تحية قلب موجع
بحنيني و بحنانو إربتاطي
و تا حقو ياخدو بمقام أرفع
برعيل الأولي يتم التعاطي
نخلي من القبر مفروض يرجع
و ملايكة السما عالأرض تنزل
و معهن أسعد و حج القماطي
و شربل بعيني عالفكر دربو اهتدى
و المجد من أبيات أشعارو ارتدى
ما في حدا بينوب عنو بهالمجال
حتى بمقلع كلمتو نشوفوا ابتدى
أحيا بجهدو الموهبي قبل الزوال
و بغربتو شاعر إلو صوت و صدى
و عني إذا حبيت إحكي بهيك حال
عقلي أنا من كلمتو الحره اقتدى
من وقت ما بعيني دخل صب الكمال
من هيك فكري صار عا قياس الدني
و فيي النظر أبعد من حدود المدى
**
مروانين
المروانين العاشو فيك
و لقلبن صفيت شريك
من التكوين خلقت كبير
و نحنا يلي منكبر فيك